A Kross … Francis Sling

Tania Kross i Francis Sling ta tur dos di Kòrsou i a bai mesun skol básiko. Den e episodio aki di A Kross … Francis ta hiba Tania den su kabes, i den e buki ku ta kresiendo for di dje: For Example. E buki a kuminsá ku mitar pensamentu ku el a anotá; algun di nan a bira kapítulo di nan mes, manera Place Before Words, tokante e lugá kaminda bo sa algu kaba promé ku bo tin palabra p’e. E título ta bisa di kiko e ta trata: nos ta biba den ehèmpel. Nos ta sigui nan, nos ta purba di ta un, i nos ta traha metáfora i poesia di nan, pero e ehèmpel nunka no ta e kos mes. Francis ta traha e buki komo un obra di arte: pretu i blanku, ku solamente e tape na blou, i ku e raspamentu i e kosnan ku no a sali bon ainda aden. E ta bin den un kaha, ku un wega di karta pa bai serka ku bo preguntanan i un gòm ku ta tambe un magnet pa bo frishidèr: un rekordatorio pa dibuhá sin buska perfekshon. Nan ta papia di duda i di AI, ku promé a hasi Francis rabiá i despues a pon’é puntra kiko e ta anto. Su kontesta: loke ta hasi bo, bo, empatia i loke ta humano. “There is nothing wrong with being wrong and not everything is right about being right.” Na su pintura di muraya For the Love of God e ta konta e historia di dos dios ku ta topa otro, i di un hòmber i un muhé ku ta baila huntu sin bira un. Su mensahe: nos tur ta kreador. Na final Tania ta yam’é “artista, hende ku ta hasi pregunta i riba tur kos un hende bunita”.